كشفت الفنانة حورية فرغلي عن مشاعر الحزن اللي بتعيشها بسبب عدم زواجها لحد دلوقتي، وأكدت إنها مش عارفة هل ممكن تلاقي الحب اللي بتدور عليه في العمر ده ولا لأ.
وخلال حوارها في بودكاست “دوبامين”، قالت: “أنا داخلة على سن الخمسين، ومش عارفة هقابل حب عمري إمتى، ولو اتجوزت دلوقتي أو في الستين، هل هلحق أعيش معاه؟”
أما عن خططها للسنة الجديدة، فأوضحت حورية إنها عندها قرارات كتير في دماغها، منها احتمال اعتزال التمثيل تمامًا والسفر برا مصر، خصوصًا لو السنة الجديدة ماكانتش أحسن من اللي فاتت.
وقالت في تصريحات سابقة بتمنى 2025 تكون سنة أحسن من 2024، عندي قرارات كتير، ولو الدنيا ماكانتش كويسة ممكن أعتزل التمثيل وأسافر بره خالص.”
في سياق تاني، صرّحت حورية إنها ماعندهاش أي حسابات رسمية على مواقع التواصل الاجتماعي، وإن حسابها الأساسي اتسرق منها من 4 سنين.
وأكدت إن كل الصفحات اللي بتنشر أخبار باسمها مش تابعة ليها، وده اللي خلا كتير من الشائعات تنتشر عنها، زي المنشور اللي اتنشر بمناسبة عيد ميلادها، واللي نفت إنها كتبته بنفسها.
حورية شددت على إنها مش بتتحكم في أي من الصفحات دي، وإن بعض الناس استغلوا اسمها عشان يروجوا لمعلومات مغلوطة بهدف تحقيق مكاسب شخصية.