هالة صدقي تكشف كواليس مسلسل بيبو.. لم أتردد في المشاركة بدعم الشباب

في تصريحات خاصة لبرنامج “اللمة تحلي” على إذاعة “شعبي إف إم” مع الإعلامية وئام وجدي، كشفت الفنانة هالة صدقي عن كواليس مشاركتها في مسلسل “بيبو”، متحدثة عن دورها، ورؤيتها للشخصية، وأهمية دعمها لجيل جديد من النجوم.

أكدت هالة صدقي أنها لم تتردد لحظة في الموافقة على المشاركة في عمل درامي يقوده فنان من الجيل الجديد، موضحة:  “ما ترددتش خالص إني أشارك في مسلسل بطولته شاب من الجيل الجديد، لأن إحنا خلاص شبعنا من فكرة إننا نثبت نفسنا أو ننتشر، إحنا نجحنا وعملنا اسمنا، لكن المهم دلوقتي إننا نكمل ونفضل موجودين، وده مش هيحصل غير لما نتواصل مع الأجيال الجديدة” .

وأشادت صدقي بموهبة الفنان الشاب أحمد بحر، الذي يجسد شخصية “كزبرة”، مؤكدة أنه نجم صاعد يستحق الدعم والفرصة، مستذكرة بداياتها:   “أحمد بحر (كزبرة) ده نجم من الجيل الجديد ولازم ياخد فرصته، وأنا نفسي في يوم من الأيام وقفت قدام نجوم كبار واتعلمت منهم، فطبيعي أدي الفرصة لغيري” .

دافعت الفنانة عن شخصية “إنعام” التي تقدمها في العمل، نافية عنها صفة الشر المطلقة، ووصفتها بأنها شخصية مركبة وإنسانية تعرضت للظلم. وقالت:  “بالنسبة لشخصية إنعام، أنا مش شايفاها شريرة خالص زي ما ممكن الناس تفتكر، بالعكس دي ست اتظلمت جدًا، واتأذت واتحرمت من ابنها سنين طويلة، فطبيعي يكون عندها رد فعل قوي.. أي أم مكانها كانت هتعمل كده، هي بس بتحاول تحافظ على ابنها وعلى حقه” .

وربطت صدقي بين شخصية “إنعام” والمرأة الصعيدية في الواقع، مؤكدة أنها استلهمت الدور من بيئتها الأصلية:  “أنا أصلًا جذوري من الصعيد، وبحب الصعيد جدًا، وده خلاني قريبة من الشخصية وفاهمة تفاصيلها كويس. وبالنسبة لشخصية إنعام، فهي موجودة في الحقيقة فعلًا، الست الصعيدية دايمًا قوية، وهي اللي بتدير البيت حتى لو الراجل باين إنه المسيطر، لكن في الحقيقة هي الأساس” .

أشارت النجمة إلى حرصها الدائم على تقديم أدوار متنوعة ومختلفة، مؤكدة أن التكرار يشكل خطراً كبيراً على مسيرة أي فنان. وصرحت:  “أنا دايمًا بحب أعمل أدوار مختلفة، لأن التكرار بالنسبة لي مشكلة كبيرة جدًا، ممكن أقبل عمل مش مقتنعة بيه قوي، لكن ما أقبلش أكرر نفسي”

وأرجعت هذا الحرص إلى وعي الجمهور المتزايد في عصر السوشيال ميديا:  “الجمهور دلوقتي بقى واعي جدًا وبيلاحظ كل حاجة، ولو حس إنك بتكرر نفسك بيقولك على طول، وده حقه طبعًا. علشان كده دايمًا بدور على حاجة جديدة أقدمها. أنا كمان بقرأ آراء الناس وبهتم بيها جدًا، لأن السوشيال ميديا خلت الجمهور فاهم شغلنا كويس أوي، وبقى عنده رؤية ونقد، وده في صالحنا” .

كل ما يخص مسلسلات رمضان 2026.. اضغط هنا للدخول إلى بوابة دراما رمضان 2026