أول تعليق من عمرو محمود ياسين على تشابه نهاية مسلسل وننسى اللي كان مع “علي كلاي”

علق السيناريست عمرو محمود ياسين مؤلف مسلسل وننسى اللي كان على انتقادات العمل، وحقيقة تشابهه مع نهاية مسلسل علي كلاي.

كتب عمرو محمود ياسين في منشور عبر حسابه الرسمي بموقع فيسبوك: “هبدة كل سنة.. يقولك النهاية اتغيرت.. أولا مفيش مرة بدخل فيها أي عمل وببقى مش محدد النهاية إيه كإطار عام.. عشان ده  أكتر شيء بيسهل رحلة الكتابة .. لأني عاوز أوصل لنقطة بعينها.. فعندي هدف .. ثانيًا سيكونس مشاهد ال MMA اللي قبل مشهد النهاية .. ده معروف ومتحدد من زمان لأن الأمور دي عايزه تجهيز .. يعني لازم نعمل معاينة .. نحجز مكان .. نجهز ديكور .. إضاءة .. نحجز  مجاميع .. يتعمل أوردر عمل .. الخ .. الخ”.

وتابع: “ولسه كل ده مابتدناش التصوير اللي بياخد  يوم كامل على أقل تقدير وإنتوا أكيد شوفتوا الكواليتي اللي متقدم في المشاهد دي .. وده كواليتي ماينفعش يبقى الو .. صباح الخير .. ماتيجوا نعمل مشاهد ضرب للركب ويلا بينا.. إيه السذاجة دي بجد؟.. التصوير مش موضوع سهل ده معقد جدًا و مليء بمئات التفاصيل (وخصوصًا لو أكشن)”

واستكمل عمرو محمود ياسين: “ده غير أن  البطولة اللي بيخوضها بدر السباعي واللي أهلته لبطولات اهم كما ظهر في الفوتومونتاج الذي تلي البطولة كانت ضرورية لتأمين نهاية سعيدة.. لأن مش معقول أن  جليلة وبدر يقدروا يعيشوا حياة سوية في ظل وجود فجوة كبيرة بينهم ..!  يعني كان ضرورة دارمية  محددة عندي من البداية  بما إني من البداية أيضًا مستهدف النهاية السعيدة .. فالموضوع متفق عليه من بدري جدًا ومعروف للجميع .. حتى الأغنية كانت متحددة ومتفق عليها من بدري ..(أغنية كله بيقلدك)”.

وأضاف: “أنا بستغرب قوي أن بعض الناس بتكلم الكلام ده!! وللأسف بعضهم بفترض فيه أن عنده خبرات  بالعملية التصويرية و الانتاجية .. وده الشق الأول من البوست .. أما عن الشق الثاني فهو رسالة حب و تقدير مني لكل من هو آت .. لهم التقدير والاحترام.. اللي حصل في المشاهد دي (مشاهد ال MMA)  من روعة في تنفيذها يعود الفضل فيها لقائمة كبيرة من الأسماء أولهم شركة الإنتاج “صدف” لحسن عسيري والمنتجين المنفذين محمد عبدالوهاب وطارق فهمي وفريق الإنتاج الكبير و ع راسهم  المنتج  الفني وليد الحسيني والمنتج الفني ايمن عباس ولاين بروديوسر عمرو الزيات ومدير ادارة الانتاج احمد عبدالرحيم.. وباقي فريق الانتاج”

واختتم: “كذلك وجبت الإشادة بالفنان كريم فهمي  الذي بذل مجهود ضخم للغاية سواء بسيكونس الحلقة الأخيرة أو بجميع مشاهد الأكشن  ليقدمها بصورة مذهلة ومقنعة  جدًا.. وأخيرا وليس آخرا .. قائد كل هؤلاء مخرج العمل الأستاذ محمد الخبيري الذي بذل مجهودُا خارقُا لتنفيذ كل مشاهد المسلسل الصعبة بهذه الحرفية والجودة والإبداع”.