كريم قاسم يكشف مفاجأة عن مسلسل مناعة: غيّرنا النهاية 4 مرات

كشف الفنان كريم قاسم مفاجأة عن مسلسل مناعة، حيث تم تم تغيير نهاية شخصية منعم أكثر من مرة.

قال كريم قاسم عبر تصريحات إذاعية: «غيرنا نهاية الشخصية 4 مرات كان في البداية هيموت في الحادثة بس أنا قلتلهم لأ، مينفعش يموت تطور الشخصية هيتوب أو هيتغير».

شخصية كريم قاسم في مسلسل مناعة

وتابع: «وفي الآخر كان القرار مشترك بيني وبين أستاذ حسين المنباوي وعمرو الدالي، ولو كان عندنا وقت أكتر كان ممكن النهاية تكون غير كده».

واستكمل كريم قاسم: «إحنا كنا مضغوطين جدًا وصورنا لحد يوم 12 رمضان، كان في مشهد حادثة مكتوب بس مصورناهوش مكنش في وقت».

تصريحات كريم قاسم

وقال عن كواليس مشاركته بمسلسل مناعة: «ترشيحي لمسلسل مناعة كان صدفة، المنتجة دينا كريم كلمتني هي كان معاها مشروعين تانيين صحاب الأرض ومشروع تاني مش هقول اسمه كنت هشارك فيه مع نجم كبير جدًا وكنت متحمس جدا للفكرة وخلاص ده المسلسل اللي هقدمه، وفجأة قالولي معانا مسلسل هند صبري، لما سمعت اسم هند صبري اتجننت وعرفت أنها راجعة في رمضان وهقدم دور أخوها وفي فترة الثمانينيات».

واختتم كريم قاسم: «وأنا كنت خلاص بحضر للمسلسل التاني وقريت حلقتين من مسلسل مناعة عجبني جدًا ومكنتش عارف أعمل إيه، في المسلسل التاني كنت هاخد أجري كامل، هنا قالولي عشان مشروع كبير مش هعرف أخد الأجر الكامل، بس حسيت أن المشروع مع أستاذ حسين المنباوي مش هينفع أفوت الفرصة دي مع مخرج عبقري، شخصية منعم مش شبهي ومعملتش أدوار زيها، عملت شخصية الحرامي وفي منطقة شعبية في ولاد رزق بس دا سينمائي أكتر».