كلام من نار.. إكرامي يفتح النار على تصريحات ميدو المثيرة للجدل ضد الأهلي
في تصعيد جديد للجدل الكروي، شن إكرامي الشحات، حارس مرمى الأهلي الأسبق ووالد الحارس شريف إكرامي، هجومًا لاذعًا على تصريحات أحمد حسام ميدو، عضو لجنة التخطيط بنادي الزمالك، بخصوص لاعبي الفريق الأول لكرة القدم بالنادي الأهلي.
إكرامي الشحات يصف تصريحات ميدو بـ”السقطة الكبيرة”
خلال تصريحات تلفزيونية عبر فضائية «إم بي سي مصر»، أعرب إكرامي الشحات عن استيائه الشديد من كلمات ميدو، قائلًا: «عيب إن ده يحصل من لاعب كبير سابق في أحد الأندية ومسؤول دلوقتي، يهاجم لاعبي الأهلي ويقول إنهم فاقدون للأساسيات في كرة القدم». وتساءل إكرامي باستنكار: «ما أنت عندك لاعيبة راحت الأهلي، يعني ما عندهمش أساسيات الكورة؟ سقطة منه إنه يقول حاجة زي دي. المفروض لاعيبة الأهلي دلوقتي أحسن لاعيبة في مصر وإفريقيا».
وأضاف الشحات مؤكدًا على أهمية المصداقية في التصريحات العامة: «مينفعش تقول كلام على الملأ على بطّال، لازم يكون فيه مصداقية في الكلام اللي بتقوله. إنت بتقول الكلام ده في دولة عربية، وإنت محسوب علينا كمصري، تقول كده على الأهلي! أنا شايف اللي قولته سقطة كبيرة».
ماذا قال أحمد حسام ميدو عن لاعبي الأهلي؟
جاءت ردود إكرامي الشحات هذه تعقيبًا على تصريحات سابقة لأحمد حسام ميدو عبر برنامج «دورينا غير»، حيث قال: «صدق أو لا تصدق، أنا رجل زملكاوي، لكن كرجل مصري ومحب للكرة المصرية كنت قاعد بتفرج على المباراة وزعلان جدًا جدًا، لأن الموضوع أكبر بكتير من أهلي وزمالك. بالنسبة لي ده أحسن فريق في مصر».
وتابع ميدو معبرًا عن خيبة أمله في مستوى الأداء: «المفروض اللاعبين يقدموا مردود أفضل من كده بكتير حتى لو هيخسروا المباراة. النهارده أنا آسف إني أكون بتابع ماتش لفريق عنده تاريخ كبير زي الأهلي، وكل اللاعبين في الملعب بلا استثناء مش عارفين يعملوا أساسيات الكورة! الاستلام والتسليم، الوقوف في الكرات الثابتة، والتحركات.. أساسيات الكورة مش عارفين يعملوها! فده كرجل مصري محب للكرة المصرية يخليني أزعل وأحزن على اللي وصلت له الكرة المصرية».