ناقد فني يشيد بأداء ريهام عبدالغفور في مسلسل حكاية نرجس: أداء ممتاز وعمل قوي
أشاد الناقد الفني أندرو محسن عبر حسابه الرسمي علبى فيس بوك، بأداء الفنانة ريهام عبدالغفور في مسلسل حكاية نرجس، قائلا: «الشر في الواقع مش لازم يكون شكله واضح وباين، في الحقيقة الشر الواضح أوي ده نادر، والشر النقي لمجرد الشر كده بدون دوافع وأسباب كمان شيء نادر، كل ده مخلي شخصية نرجس ممتازة وأداء ريهام عبد الغفور ليها مناسب جدًا ومش بنشوفه كتير».
أداء استثنائي
وأضاف: «في الحلقة الأولى نرجس تبان ست عندها بعض القوة لكنها كمان مغلوبة شويه قدام الظروف المحيطة بيها، لحد ما بيظهر جانب حنية وحب تجاه جوزها الجديد عَوْني (حمزة العيلي) لكن في الحلقة التانية بتبان تفاصيل جديدة في الشخصية، جانب شرير شوية، بس مش شر لمجرد الشر، لكن عشان تفضل محافظة على أمانها وتحقق أمنياتها، أذى بسيط من وجهة نظرها، لكنها في المقابل ما زالت بتتعامل مع جوزها كويس، ولسه هيبان جوانب أكتر أكيد في الحلقات الجايه، أي جانب من الشخصية هيبان أكتر».
وتابع: «وجود شخصية ليها أبعاد كتير ده، بالذات بين جانبي الأذى والطيبة مش بنشوفه كتير، حاجة كمان مهمة هي إننا في كتير من المسلسلات المصرية، بنقدر نحدد الشخصيات الشريرة بمجرد أول ظهور ليها، من خلال تعبيرات محفوظة للوش، أو -ودي الطريقة المستفزة جدًا- إن الشخص يكون بيتكلم عادي جدًا مع اللي قدامه، وأول ما يمشي اللي بيكلمه نلاقيه قلب وشه، عشان نفهم -احنا المشاهدين ضعاف الفهم- إنه بيخدعه، وكأن أي واحد بيعمل أذى في الحقيقة لازم يأكد على الموضوع بتعبيرات وشه وإلا كده مش هيدخل ضمن رابطة الأشرار».
وأتم منشوره قائلا: «لحد دلوقتي الحلقتين اللي اتعرضوا من حكاية نرجس حلوين جدًا ومستني اللي جاي، المسلسل فكرة وإخراج سامح علاء ومعالجة درامية وسيناريو وحوار عمار صبري».
أبطال مسلسل حكاية نرجس
يضم مسلسل حكاية نرجس مجموعة من النجوم، بينهم ريهام عبدالغفور، وحمزة العيلي، وتامر نبيل، وسماح أنور، ودنيا ماهر، وبسنت أبو باشا، وأحمد عزمي، إلى جانب عدد آخر من الفنانين، المسلسل من تأليف عمار صبري، وإخراج سامح علاء، وإنتاج محمد مشيش.
تعليقات