واستطرد في شرح المأساة، قائلاً: “الدكاترة الكبار لما كانوا يشوفوا الجرح، كنت بصعب عليهم لأن المنظر كان صعب جدًا، أنا كنت شايف عضم رجلي من جوه، وحالتي النفسية تدهورت”.
وأشار إلى أن “ربنا أكرمني بالنجمة بدرية طلبة، والدكتور أشرف زكي، وزمايلي في مسلسل “بـ100 وش” وقفوا جنبي وحاولوا يقنعوني أروح للدكتور، لكن (بدرية) عملت حيلة نفسية لما الدكتور قال لها: (إحنا وصلنا لمرحلة البتر)، لكنها ما قالتليش، وقالت لي: (بكرة ناخد حقنة ورجلنا هتخف)، وما كنتش عارف إن دي حقنة البنج عشان البتر”.
وعن لحظة اكتشافه بتر قدمه، قال: “بعد الإفاقة من البنج، اكتشفت إن رجلي مش موجودة، قطعوها، وكان ممكن أنهار، لكن علاقتي بربنا اللي كانت ممتدة، خصوصًا عبر البحر في إسكندرية، خلتني استقبل الموقف بهدوء، وجاتني رسالة داخلية كأنها خاطر: (متتكلمش خالص عن قطع رجلك)، وتجاوزت المحنة دي بفضل الطبطبة الإلهية، وخلتني قدرت أواجه الموقف بابتسامة”.
وأكد دسوقي أن علاقته بربنا قائمة على عمق روحاني وخاصة جدًا، وأن إحساسه وعلاقته بربنا بيعكسوا قناعة قوية إن أي موهوب لازم تكون له علاقة وثيقة بربنا بشكل لحظي، مشيرًا إلى أن المقصر في علاقته بربه بيخسر كتير وما بيعيش طويل في قلوب الناس.
وأضاف: “من صغري كنت أحس وكأنني أتلقى رؤى وأحلام، وأنا ساكن قدام البحر في إسكندرية، كنت أطلع للبحر وأفضفض معاه، كنت أقول له: (بالله عليك، وصل لربنا الرسالة، لأنني عارف ومتأكد إنك هتوصلهاله)، فلو زعلان، أقول للبحر: (أنا زعلان، قول لربنا)، وإذا كنت فرحان، أقول له: (اشكر لي ربنا، أنا فرحان إنه فرحني)”.
وأشار إلى “أنه واجه أزمات قاسية وشديدة قبل الأزمة الأخيرة، وكانت قادرة على القضاء عليّ، اللي كان بيقويني جلوسي قدام البحر اللي كان سند لي، علاقتي بربنا متأصلة جوايا من وقت الإصابة”.
وأوضح: “رغم الصدمة، ما سمحتش لنفسي بالانهيار، لأن علاقتي بربنا كانت السبب في تقبلي للأمر. أول خاطر جالي كان رسالة داخلية تقول: (اوعى تبكي)، وما بكيتش إلا في لحظة واحدة بعيد عن الكل، كل الناس اللي زاروني، من وفد رئيس الجمهورية لنجوم مصر الكبار، كانوا بيقولوا لي جمل تضغط على قلبي، لكن دعوت ربي إنه يمنحني القوة، وفعلاً حسيت إنه بيطبطب عليّ ويرسل لي الطمأنينة”.
واختتم حديثه قائلاً: “بعد الإصابة، ربنا فتح لي باب رزق، واتعاقدت على مسرحية الفنان يحيى الفخراني، عشان ربنا يقولي: (أنت موجود، وهتكمل، ومش هتتنسي)”.
اقرأ أيضًا:
السيسي: مصر لن تشارك في أي ظلم يقع على الشعب الفلسطيني
موعد إجازة عيد الفطر 2025 وفقًا لما أعلنه معهد البحوث الفلكية
صور جوية وخرائط تكشف مسارات وأسماء محطات مونوريل شرق وغرب النيل