كل تأخيره وفيها خيره.. المخرج عالمي محمد دياب يشيد بمسلسل أشغال شقة

الأربعاء، 05 مارس 2025 05:34 م

3/5/2025 5:34:05 PM

أعرب المخرج محمد دياب عن سعادته البالغة بنجاح مسلسل أشغال شقة لشقيقيه خالد وشيرين دياب، مشيرًا إلى أنه لم يكن متوقع النجاح الكبير.

وقال دياب في منشور له عبر حسابه الشخصي بموقع التواصل الاجتماعي فيسبوك: الحمد لله أشغال شقه للسنه التانيه ينجح نجاح ساحق، بس ورا النجاح ده قصه.

وأضاف: أشغال شقة ده لمده خمس سنين بيتعرض علي منتجين مصر كلهم و لكن مكانش فيه حماس ليه، تقريبا معظم ممثلين مصر رفضوه رجاله و ستات. و لما مره نجم كبير تحمسله و مضاه فضل يطلب تغييرات لدرجه انه في الآخر طلب ان شغل البطل يتغير و تتشال فكره الشغالات!.

وواصل: في ناس مكانتش عاجباها الفكره و ناس كانت شايفه اننا بنكتب جد فمش هنعرف نعمل كوميدي، و ناس عايزه الفكره بس اللي يخرجها حد تاني غير خالد، رد الفعل ده كان هيجنن خالد وشيرين، احساس صعب لما تبقي مؤمن بحاجه و اللي حواليك مش شايفنها، ساعات ده بيشككك في نفسك. اربع سنين تعدي و مينزلش لخالد و شيرين أي مشروع، الضغط خلي خالد يقبل ان اشغال شقه يتعمل و لو بمخرج تاني. خالد لأي حد يعرفه هو اكتر انسان كوميدي تقدر تعرفه و انا و شيرين كان عندنا قناعه انه من اشغال شقه هيطلع كوميديته الخاصه اللي هتكسر الدنيا.

واستكمل: بصعوبه شديده رجع خالد و شيرين يحاولوا ورا المسلسل، لغايه لما جه هشام ماجد اللي آمن بيه و بخالد كمخرج و جت شركه الأنتاج (اي برودسيرز) اللي هيأتله اسباب النجاح، اشغال شقه نجح و استخدم توليفه كتابيه مختلفه مش قايمه عالإيفيهات، و خالد كمخرج طلع عنده صوت و شخصيه و رؤيه بصريه باينه في كل مشهد. انا طول عمري بتفرج علي كوميديا المسلسلات و ابتسم كام مره و ابقي مرضي، بس ان الواحد يضحك بصوت و لغايه لما بطنه توجعه و ده يحصل كل حلقه، فمتخيلتهاش تحصل في مسلسل.

وأختتم دياب قائلًا: بالنسبالي المخرج و المؤلف الشاطرين هما اللي بيعملوا حاجه احس اني معرفش اعملها و انا لما بتفرج علي اشغال شقه ببقي متأكد اني معرفش اعمل منه مشهد، فعلاً كل تأخيره و فيها خيره.