المفروض المرأة الحامل تشرب ماية قد ايه يوميا؟

الماية ضرورية لاداء وظائف فسيولوجية مختلفة في الجسم ، وبتزيد الحاجة للماية اثناء الحمل ، طب يا ترى ايه هي كمية الماية المناسبة للمرأة الحامل؟ معرفة ده هيساعدك في الحفاظ على رطوبة جسمك بشكل كافي وتقليل خطر الاصابة بمشاكل الحمل الشائعة زي الامساك, التورم, التهابات المسالك البولية ، والجسم بيستمد الماية من السوائل والاطعمة اللي بتدخل جسمك يوميا ، واحتياجات الجسم اليومية بتعتمد على عوامل زي مستويات النشاط البدني, حجم الجسم, ظروف الطقس ، تابعي معانا السطور الجايه واتعرفي على كمية الماية اللي لازم تشربيها اثناء الحمل ، وفوايدها ، ونصايح عملية لضمان الحصول على كمية كافية من الماية.

ليه مهم جدا ترطيب الجسم اثناء الحمل؟

– شرب كمية كافية من الماية هتساعد في تعزيز صحة الام وتنظيم مستويات الترطيب والتمثيل الغذائي ، وبتزيد حاجة الجسم للماية اثناء الحمل للحفاظ على ترطيب الام ودعم نمو الجنين ، وبيزيد الطلب على الماية اثناء الحمل زيادة تدريجية في حجم الدم من 6- 8 اسابيع ، وبتوصل ذروتها في الاسبوع 32 – 34.

– الماية بتساعد في تكوين السائل الامينوسي.

– زيادة التعرق بسبب زيادة نشاط الغدة الكظرية والغدة الدرقية ، وتسريع عملية التمثيل الغذائي ، وزيادة تدفق الدم للجلد.

ايه هي كمية الماية اللي المفروض تشربيها اثناء الحمل؟

النساء الحوامل المفروض يشربوا من 8 – 12 كوباية حوالي من 1.9 – 2.8 لتر من الماية يوميا.

الابحاث بتشير ان الشخص البالغ بيحتاج عادة من 1 – 1.5 مل من الماية لكل سعر حراري بيدخل الجسم ، ومع زيادة متطلبات السعرات الحرارية خلال كل تلت من الحمل ، بتزيد كمان حاجة الجسم للماية ، تابعي معانا واعرفي ازاي تحسبي احتياجك للماية على حسب متطلبات السعرات الحراربة المتزايدة لكل تلت من الحمل.

– التلت الاول من الحمل: اغلب النساء الحوامل اللي وزنهم طبيعي وصحتهم كويسة بيحتاجوا ل 1800 سعر حراري يوميا في التلت الاول من الحمل ، وبالتالي احتياجاتهم اليومية من الماية حوالي 1.8 – 2.7 لتر ماية ، حوالي 8 – 11 كوباية.

– التلت التاني من الحمل: المرأة الحامل في التلت التاني من الحمل بتحتاج 2200 سعرة حرارية يوميا ، عشان كده بننصح الام ب 2.2 – 3.3 لتر ماية ، حوالي 9 – 14 كوباية ماية يوميا.

– التلت التالت من الحمل: خلال التلت التالت من الحمل ، بيوصل متوسط السعرات الحرارية الموصي بيها يوميا حوالي 2400 سعرة حرارية ، وده هيناسبه احتياج يومي من الماية بين 2.4 – 3.6 لتر ، حوالي 10 – 15 كوباية ماية.

ملحوظة مهمة: شرب كمية كافية من الماية اثناء الحمل ضروري جدا للامهات عشان يكون عندهم احتياطي كافي لتحمل فقدان الدم اثناء الولادة.

فوايد ترطيب الجسم اثناء الحمل:

1- هيحافظ على هدوئك.

2- تخفيف الغثيان الصباحي.

3- تحسين الهضم اثناء الحمل.

4- تقليل الوذمة.

5- تعزيز طاقة الجسم.

6- تقليل خطر الاصابة بعدوى المسالك البولية.

7- تقليل خطر الانقباضات المبكرة والولادة المبكرة.

8- ترطيب البشرة.

9- منع الامساك والبواسير المصاحبة لمشكلة الامساك.

10- الماية بتساعد على امتصاص الفيتامينات القابلة للذوبان في الماية بشكل كافي ، زي فيتامين ج وفيتامين ب المركب.

علامات الجفاف اثناء الحمل:

عدم تناول كمية كافية من الماية اثناء الحمل ممكن يأدي للجفاف ، الجفاف بيحصل لما بتشربي كمية ماية اقل من الماية اللي بيفرزها الجسم ، وده بيخلي الجسم صعب عليه يقوم بوظايفه المختلفة ، وعلامات الجفاف اثناء الحمل هي.

– الشعور بالعطس المستمر.

– بول بلون اصفر غامق او ريحنة قوية.

– دوخة.

– تعب.

– جفاف الفم والشفايف والعينين.

– انخفاض معدل التبول ، اقل من 4 مرات في اليوم.

نصايح لشرب كمية ماية كافية اثناء الحمل:

ممكن يكون شرب كمية ماية محسوبة موضوع مرهق بالنسبة لك ، ولكن النصايح العملية دي هتساعدك في تسهيل الموضوع عليكي.

– احتفظي بزجاجة ماية في متناول ايديكي تكون جنبك باستمرار ، وانتي خارجة خدي معاكي زجاجة ماية عشان تفتكري شرب الماية.

– اشربي ماية كل ما تحسي بالعطش على طول وقبل وبعد النشاط البدني ، واختاري الماية بدل المشروبات الغازية او مشروبات الطاقة.

– خلي من عاداتك تشربي ماية اول ما تصحي من النوم ، اشربي كمان ماية بعد كل وجبة رئيسية او وجبة خفيفة.

– اعملي ماية منعشة بنكهة مميزة ومختلفة عن طريق اضافة اوراق النعناع, شرايح الليمون, شرايح فاكهة زي الفراولة او غيرها من الفواكة المفضلة.

– جمدي الفاكهة الطازة في مكعبات تلج وضيفيها لكوباية الماية لاضافة نكهة مختلفة ، وممكن تستخدمي الماية الفوارة.

– اضبطي موبايلك عشان يفكرك بشرب الماية على فترات منتظمة.

– شيلي معاكي زجاجة ماية اثناء السفر عشان ماتعتمديش على اي حاجة تانية غير الماية للترطيب ، بالاضافة ان ده بيمنع الاصابة بالامراض المنقولة عن طريق الماية بسبب شرب ماية من مصادر غير آمنة.

نصيحة سريعة: اتجنبي او قللي من شرب الكافيين ، وابعدي عن الحرارة (مارسي الرياضة لما يكون الجو مش حر بره او جوه البيت) ، كلي فواكة مرطبة زي البطيخ لتلبية احتياجاتك الزيادة من الماية اثناء الحمل.